Bli Z (BTI) Betre Tverrfaglig Innsats, Bli Z-modellen, er ein samhandlingsmodell som beskriv den samanhengande innsatsen i og mellom tenester retta mot gravide, born, unge og familiar som det er knytt ei bekymring til. Bli Z-modellen skal bidra til tidleg innsats, samordna tenester og foreldreinvolvering.
Tidleg innsats handlar om å førebyggja meir og å avdekkja vanskar tidlegare, hos både born, unge og familiar som me kjenner ei uro for. Tidleg innsats kan både handla om å oppdaga vanskar i tidleg alder, og å oppdaga vanskar tidleg i ei risikoutvikling. Det kan vera forhold i heimen, eigenskapar ved barnet/ungdommen/familien, eller miljøet i barnehagen/skulen eller på fritida som skapar utfordringar. Heimen, helsestasjonen, barnehagen og skulen har difor ei sentral rolle både i å oppdaga vanskar og å følgja dei opp. Hjelpetiltaka som vert sette i verk, har merksemd på å styrkja beskyttande faktorar og redusera risikofaktorar rundt barnet/ungdommen/familien.
Samordna tenester handlar om å betra samarbeidet og ikkje minst framdrifta når kommunale basistenester (t.d. helsestasjon, skule, barnehage) og hjelpetenester (t.d. helseteneste, PPT, barnevern, tenester for ungdom, SLT-koordinator) i fellesskap skal hjelpa barn/ungdom/familiar gjennom vanskar. Med ein klar struktur bidreg Bli Z-modellen til styrkt samhandling mellom tenester, slik at dei arbeider målretta, effektivt og heilskapleg – og utan at det oppstår avbrot i oppfølgjinga.
Foreldreinvolvering handlar om at Bli Z-modellen er basert på at foreldre/føresette i utgangspunktet alltid skal vera ein del av løysinga på eit problem. Det blir derfor lagt stor vekt på at dei kommunale verksemdene/tenestene skal samhandla med foreldra gjennom hjelpeprosessen, og at foreldra skal involverast på eit tidleg tidspunkt etter at uroa for barnet/ungdomen har oppstått. Foreldreinvolvering inneber også at foreldre på eige initiativ kan involvera kommunale verksemder/tenester dersom dei er bekymra for eigne eller andre sine born.
Involveringa av foreldre har både ei etisk og fagleg grunngjeving. Den etiske dreiar seg om å respektera det overordna ansvaret foreldra eller andre føresette har for eigne born. Det faglege dreiar seg om at foreldra ofte er ein avgjerande aktør, og heimen ein viktig arena i det førebyggjande arbeidet med born og unge.
I kommunikasjonen mellom kommunal teneste(er) og familien, vert ein elektronisk stafettlogg brukt som eit viktig samhandlingsverktøy.
Vanskar knytte til fysisk og psykisk skulemiljø (kapittel 9A-saker)
I arbeid med 9A-saker er det i følgje opplæringslova skulen som har ansvaret for aktiviteten og handlingsplanen som skal utarbeidast til hjelp for barnet/ungdommen. Hjelpetenestene vil vera eit supplement til skulen sitt arbeid, men kan ikkje overta ansvaret som skulen har.
Bli Z (BTI) består av ein grunnmodell med tilhøyrande handlingsrettleiar, verktøy og kompetansen til dei tilsette.
Grunnmodellen i Bli Z skildrar korleis samhandlinga kan leggjast til rette på fire ulike nivå, avhengig av omfanget på vanskane som skal løysast og talet på aktørar som skal involverast:
Nivå 0: Her avklarar me om det er grunnlag for bekymringa
Nivå 1: Beskriv tiltak innanfor kvar enkelt teneste
Nivå 2: Beskriv eit enkelt tverrfagleg samarbeid, helst mellom to tenester
Nivå 3: Beskriv eit meir omfattande tverrfagleg samarbeid mellom fleire tenester
Nivåa og tenestene i grunnmodellen vert bundne saman gjennom ein samarbeidsstruktur som er basert på at ein aktør, stafetthaldaren, har ansvar for å koordinera den tverrfaglege samhandlinga og dokumentera arbeidet i ein elektronisk stafettlogg.
Bli Z-rettleiaren er sjølve oppskrifta på korleis me skal gå fram i konkrete tilfelle der me er bekymra for born/ungdom/familiar. Rettleiaren beskriv strukturane og prosessane me skal nytta oss av i arbeidet med barn og unge, både innanfor kvar enkelt teneste og mellom tenestene.
Verktøya er dei konkrete hjelpemidlane me kan og bør nytta i det daglege arbeidet med Bli Z-saker. Verktøya inkluderer spesifikke metodar eller rutinar som støttar handlingane i Bli Z-prosessen, heilt frå fasen der me oppdagar og vurderer ei uro og vidare gjennom fasane med å avgjera, setja i verk og evaluera hjelpetiltak. Me snakkar her om alt frå konkrete tips og råd til korleis me samtalar med born og unge til mal for korleis me kallar inn og gjennomfører møte.
Kompetansen
Ein føresetnad for at me kan bruka Bli Z-modellen, er at medarbeidarane i kommunen har kompetanse. Me snakkar då om to typar kompetanse:
Kompetanse til å forstå og bruka samarbeidsstrukturane i Bli Z-modellen.
Kompetanse til å utføra oppgåvene som ligg innanfor dei ulike prosessane i modellen. Dette inneber at me må ha evner til å oppdaga barn/unge/familiar som gir oss ei bekymring, til å samtala med barn/unge og føresette, og me må vera i stand til å gjera oss nytte av hjelpetiltak og andre hjelpetenester der dette er nødvendig.