Bli Z samhandlingsmodell er utvikla for å synleggjera kor viktig det er at alle born og unge har nokon som ser dei og kan hjelpa dei om dei har det vanskeleg. Det kan vera ein ven, forelder, nabo, personale i barnehagen eller skulen, trenaren, helsesjukepleiar eller anna hjelpepersonell. Modellen byggjer på den nasjonale satsinga for Betre Tverrfagleg Innsats (BTI), med lokale tilpassingar for Etne kommune.
Gjennom Bli Z samhandlingsmodell skal oppvekst, helse og andre hjelpetenester bli endå betre på å samarbeida med barn og ungdom med føresette. Målgruppa er frå minus 9 mnd. til 24 år. For å få dette til, samarbeider ein på tre ulike nivå i kommunen.
For at alle skal bli sett, treng fagpersonar kunnskap om korleis dei skal gå fram når dei er urolege for eit barn, ungdom eller familie. Bli Z-rettleiaren gjev alle tilsette i Etne kommune informasjon og hjelp for å sikra rett framgangsmåte i situasjonen dei står i. Har ein ei uro og treng hjelp, melder ein saka vidare til operativ ressursgruppe etter samtykke frå føresette. For at ressursgruppa skal kunna rettleia og støtta på beste vis, skal skal det vera gjort ein pedagogisk analyse.
Stafettlogg skal visa dei ulike tiltaka ein har sett i i verk og kva ein har lukkast med. Stafettloggen forenklar den profesjonelle samhandliga, opnar for dialog og sikrar dokumentasjon.
For born, elevar, ungdom eller vaksne med behov for langvarige og koordinerte tenester etter helse- og omsorgstjenesteloven, skal kommunen tilby koordinator. jfr. helse og omsorgstenesteloven §7-2. Koordinator kallar inn til ansvarsgruppemøte. Etter ynskje frå den det gjeld deltek aktuelle tenesteutøvarar på møta. Koordinator leiar møta og er også ansvarleg for å tilby og følgja opp individuell plan. Les meir om Koordinerande eining.
Ressursgruppene i barnehage og skule skal arbeida med pedagogiske problemstillingar knytt til tilpassa opplæring. Dei skal medverka til å styrkja brua mellom allmennkompetanse og den spesialpedagogiske kompetansen, ta initiativ til førebyggjande arbeid, systemarbeid og driva rettleiing. Ressursgruppa skal ha merksemd på alle born i det førebyggjande perspektivet.
Tilpassa opplæring skal i hovudsak bli tatt i vare av den enkelte lærar/pedagog. Operativ ressursgruppe skal fungera som ein støttespelar og samarbeidspart i dette arbeidet. Målet er å gjera den enkelte lærar/pedagog i stand til å handtera utfordringa i det operative nivået. Ved behov for bistand frå ressursgruppa skal samtykke, dialog med heim og barn, pedagogisk analyse, kartleggingar, utprøvingar og evalueringar visast slik at ressursgruppa kan bidra på beste vis. Ressursgruppa skal sikra at ein har samtykke for dei individsakene ein skal drøfta.
Oppgåver for ressursgruppa
- Utvikla system for tilpassa opplæring
- Rettleia lærar/pedagogar, faglærar og assistentar
- Følgja opp og vurdera tiltak som blir sett i verk
- Oppfølging, vurdering av spesialundervisning og minoritetsspråklege elevar i samarbeid med lærar/pedagog
- Drøfta born og tiltak som kan setjast i verk på gruppenivå, individnivå
- Gje informasjon, råd og rettleiing om tilpassa opplæring, metode og materiell
- Kvalitetssikra kartlegging/testing av born
- Organisera kurs/samtalegrupper for born/tilsette
- Henta inn spesialkompetanse ved behov
- Ha oversyn over tilgjengeleg programvare, materiell til bruk ved tilpassa opplæring eller spesialpedagogisk hjelp/spesialundervisning.
- Ha kontakt med kommunen sine andre støttefunksjonar (helse, barnevern, lege, familieteam, IT og andre.)
- Ta initiativ til førebyggjande arbeid og særleg ha merksemd på fråværsproblematikk – sikra at gode rutinar for overgangane (samanhengane) blir følgt
- Drøfta saker som skal tilvisast PPT før dei blir meldt vidare.
Samansetjing og mynde
- Einingsleiar er leiar av møta. Spes.ped.koordinator/spes.ped.gruppa barnehage og PPT-kontakt er faste deltakarar. Skulehelsetenesta er fast med i eitt av møta i månaden, elles etter behov. Vidare kan eininga vurdera å ha med andre støttetenester, men også pedagogar som har særleg kompetanse, innan spesialpedagogikk, åtferdsprogram, mekling eller anna.
- Skal føresette/barn/elev vera deltakarar i deler av ressursgruppemøtet bør ein leggja den saka til siste del av møtet slik at ein sikrar god kvalitet og spissa merksemd.
- Operativ ressursgruppe skal ha faste, timeplanfesta møte. Det skal sendast ut saksliste før møtet. Referat skal skrivast, der ein kort seier litt om dei ulike sakene – kva oppgåver som skal bli gjort, av kven og kva tid vil desse oppgåvene vera gjennomført og /evaluert. Dette skal arkiverast på det enkelte barnet i individsaker og i «ressursgruppe-mappa» i systemsaker (bruk malar i websak).
- Ressursgruppa skal laga ein årsplan eller eit årshjul som viser når faste oppgåver skal takast opp. Årsplanen må synleggjerast for eininga.
- Tilvisingar til PPT skjer via operativ ressursgruppe. Ressursgruppa er rådgjevande. Det er rektor som sender tilvisingar og fattar vedtak.
Rett hjelp til rett tid er målet for samhandling i Etne kommune. Arbeid med tidleg innsats og samhandlinga rundt born, ungdom og familiar skal vera forankra i leiinga.
Kommunegruppa skal dela erfaringar, finna felles praksis og saman utvikla system for å gje born og unge det dei treng når dei treng det. Aktuelle saker kan vera å laga, avklara og godkjenna nye rutinar, prioriteringar og satsingsområde rundt born, unge og familiar.
I kommunegruppa møter leiarar i barnehage, skule, helse og støtteeiningar.
Møtefrekvens 4 gonger i året. Kommunalsjefane for oppvekst og helse kallar inn og leiar kommunegruppa. Referat på omgang.
Strategisk gruppe skal også sikra at satsinga vert skriven inn i planarbeidet til kommunen og bli orientert om i administrativ og politisk leiing.
Bli Z- samhandlingsmodell skal sjåast i samanheng med dei strategiske styringsmåla i kommunen. Strategisk leiargruppe skal sikra at effektmål vert nådd: – Fleire born og elevar skal passa inn i det ordinære.
I strategisk leiargruppe møter kommunedirektør med si leiargruppe.
Møtefrekvens 2 gonger i året. Kommunalsjefane for oppvekst og helse kallar inn og leiar møta. Referat på omgang.